Panaginip
Tula ni Raymund Tamayo
Napaginipan ko kagabi ---
ikaw at ako’y nakatira
sa isang bahay na umuuga.
Sa tuwing ako’y hahakbang,
lumalangitngit ang bawat siit
ng sahig na kawayan
at pag ikaw naman ay tumatakbo
para patayin ang apoy ng sinaing,
nalalaglag ang mga agiw
mula sa pagkakakapit
sa abuhin nating kisame.
Sa paghiwa mo ng sibuyas, mahal
wag masyadong damdamin
ang luhang papatak
sapagkat sa paggisa ko
malalanghap din
ang inaasahang sarap.
Napanaginipan ko rin kagabi
habang tayo’y nagniniig
ay bumigay ang pundasyon
at kasama niya tayong tumumba ---
Ikaw
at ako
pati
ang bahay na umuuga.
No comments:
Post a Comment